Joan den larunbatean, martxoaren 16an, Mauleko II. Libürüaren Egüna egin zen. Euskaltzaindiak parte hartu zuen, eta saltoki bat jarri. Bertan, nobedadeez gain, Zuberoako hainbat gai jasotzen duten liburuak erakutsi zituen Akademiak.

Aurtengo edizioaren gai nagusia emakumea eta literatura izanik, gai honen inguruan ekitaldi ugari egin ziren egun osoan zehar. Miren Agur Meabe idazle eta euskaltzain urgazleak olerki batzuk irakurri zituen, eta mahai-inguru batean hartu zuen parte. Jean-Baptiste Coyos eta Jean-Louis Davant euskaltzain osoak Libürüaren Egünean izan ziren, eta Andres Urrutia euskaltzainburua ere Maulera joan zen.

Aurten beteko da Iñaki Eizmendi Manterola “Basarri”-ren jaiotzaren mendeurrena. Horren haritik, bertsolari, kazetari eta ohorezko euskaltzaina izan zenaren omenezko egitarau zabala prestatu dute hainbat erakundek, urte osoan zehar egiteko. Apirilean hasi eta azaroa bitartean burutuko da egitaraua, eta, besteak beste, hitzaldiak eta bertso saioak egingo dira. Azaroan izango dira ekitaldi garrantzitsuenak: Basarriri buruzko erakusketa eta "Basarritik Azken Portura" jaialdia. Hilaren 28an, Euskaltzaindiaren Herri Literatura batzordeak ageriko ekitaldi bat egingo du, eta 29an Akademiak Osoko Bilkura egingo du Zarautzen.

Horren guztiaren aurkezpena atzo, martxoaren 14an, egin zen Zarautzen. Bertan, "Basarri" omendu nahi duten erakunde guztietako ordezkariak izan ziren: Gari Berasaluze Zarauzko Udaleko Kultura zinegotzia; Garazi Lopez de Etxezarreta Gipuzkoako Foru Aldundiko Kultura zuzendaria; Iñaki Murua Euskal Herriko Bertsozale Elkarteko presidentea; Jose Maria Arrazola Eusko Ikaskuntzako Gipuzkoako presidenteordea; Iñigo Manzisidor "Motxian" Bertso Eskolako zuzendaria; Zarautz Abesbatzaren ordezkariak; eta "Basarri"-ren senitartekoak. Euskaltzaindiaren izenean Andoni Sagarna Gipuzkoako ordezkaria izan zen.